Category: Odia

କମ୍ପି ଉଠେ ଏ ଧରାଧାମ
ନେଲେ ବୋଲି ଯୀଶୁ ଜନମ
ଝୁମି ଉଠେ ଏ ତନୁ ପ୍ରାଣ
ନେଲେ ବୋଲି ଯୀଶୁ ଜନମ
ହସୁଛି ନୀଳ ଗଗନ
ନାଚୁଛି ଗିରି କାନନ
ଆନନ୍ଦିତ ଲାଗେ ଏ ମନ
ଉଲ୍ଲସିତ ହୁଏ ଏ ପ୍ରାଣ….=୦=

ସୃଷ୍ଟି କାଳାବଧି ଯାହାଙ୍କ ବିଷୟ
ଧର୍ମ ଶାସ୍ତ୍ରେ ଥିଲା ଲିଖିତ
ପ୍ରତିଜ୍ଞାନୁସାରେ ପ୍ରତିଜ୍ଞାତ ସୂତ
କଲେ ତାହା ସଫଳିକୃତ
ପିତାଙ୍କ ଆଦେଶମାନ
ମାନିଲେ ଯୀଶୁ ରାଜନ
ଆନନ୍ଦିତ ଲାଗେ ଏ ମନ
ଉଲ୍ଲସିତ ହୁଏ ଏ ପ୍ରାଣ….=୦

ସରଗର ଦୂତ ହୋଇ ଉପସ୍ଥିତ
କହିଲେ ନ ହୁଅ ଭୟାର୍ତ୍ତ
ଅଦ୍ୱିତୀୟ ପୁତ୍ର ହୋଇଛନ୍ତି ଜାତ
ପାପ ତାପ କରିବେ ଧୌତ
ମାନବ ରୂପ ଧରିଣ
ଆସିଲେ ମର୍ତ୍ତ୍ୟ ଭୂବନ
ଆନନ୍ଦିତ ଲାଗେ ଏ ମନ
ଉଲ୍ଲସିତ ହୁଏ ଏ ପ୍ରାଣ….=୦

ଗୀତ ରଚନା ଓ ସ୍ୱର ସଂଯୋଜନା
ଅମିତ୍ ବଡ଼ନାୟକ

ସୂଚୀମାଳାକୁ ଫେରନ୍ତୁ

ଶେଷ ଘଣ୍ଟି ବାଜିଲାଣି
ମହା କ୍ଳେଶ ପାଖେ ଆସିଲାଣି
ଜାଗ ଜାଗ ଜାଗ ବନ୍ଧୁ ଗଣ ଜାଗ
ଜାଗି ଉଠ ଏହି କ୍ଷଣି
ସତର୍କର ଶେଷ ବାଣୀ
ଚଉଦିଗେ ଏବେ ଶୁଭିଲାଣି
ଶୁଣ ଶୁଣ ଶୁଣ ବନ୍ଧୁ ଗଣ ଶୁଣ
ମନ ଦେଇ ଯାଅ ଶୁଣି
ଶେଷ ଘଣ୍ଟି ବାଜିଲାଣି………=୦=

ଶୋଇବ କେତେ ନିଦ୍ରିତ ହୋଇ
କ୍ଷଣିକ ହେଲେ ସମୟ ନାହିଁ
ବିଳମ୍ବ ଆଉ ନ କର କେହି
ଜାଗ୍ରତ ହୁଅ ମନ ଫେରାଇ
ଭୂମିକମ୍ପ ଘଟିଲାଣି
ମହାଯୁଦ୍ଧ ଆରମ୍ଭ ହେଲାଣି
ଉଠ ଉଠ ଉଠ ବନ୍ଧୁ ଗଣ ଉଠ
ଚେଇଁ ଉଠ ଏହି କ୍ଷଣି………=୧=

ଏମିତି ଯଦି ହେଳା କରିବ
ତେବେ କେମିତି ରକ୍ଷା ପାଇବ
ଯୀଶୁଙ୍କୁ ଯଦି ହୃଦେ ରଖିବ
ଶେଷରେ ପରିତ୍ରାଣ ଲଭିବ
ସମୟଟା ସରିଲାଣି
ଯୁଗ ଶେଷ ଦିନ ଆସିଲାଣି
ଫେର ଫେର ଫେର ବନ୍ଧୁଗଣ ଫେର
ଫେରି ଆସ ଏହି କ୍ଷଣି………=୨=

ଗୀତ ରଚନା ଓ ସ୍ୱର ସଂଯୋଜନା
ଅମିତ୍ ବଡ଼ନାୟକ

ସୂଚୀମାଳାକୁ ଫେରନ୍ତୁ

କାନ୍ଦେ ଆଜି ମୋ ଅନ୍ତର
କଥା ଭାବି ସେ କ୍ରୁଶର (୨ଥର)
ଆହା କି ଯନ୍ତ୍ରଣା ଆହା କି ବେଦନା (୨ଥର)
ସହିଲ ହେ ପ୍ରଭୁ ମୋର (୨ଥର)…..| ୦|

କୋରଡ଼ା ପ୍ରହାରେ ପ୍ରଭୁ
ହେଲ ତୁମେ ପ୍ରହାରିତ
ସର୍ବାଙ୍ଗ ଶରୀର ତୁମ
ହେଲା ରକତେ ରଞ୍ଜିତ (୨ଥର)
ଦାରୁଣ କଷଣ ନିନ୍ଦା ଅପମାନ (୨ଥର)
ସହିଲ ହେ ଯୀଶୁ ମୋର (୨ଥର)……..|୧|

ବହି ନେଲ ନିଜ କାନ୍ଧେ
ଜଗତର ପାପ ଭାର
ଝରାଇଲ କେତେ ପ୍ରଭୁ
ତପୋତ ରୁଧିର ଧାର (୨ଥର)
ମାନବ କାରଣ ଦେଇ ନିଜ ପ୍ରାଣ (୨ଥର)
ସାଧିଲ ପ୍ରେମ ତୁମର (୨ଥର) …. |୨|

ଗୀତ ରଚନା ଓ ସ୍ୱର ସଂଯୋଜନା
ଅମିତ୍ ବଡ଼ନାୟକ

ସୂଚୀମାଳାକୁ ଫେରନ୍ତୁ

କେତେ କାଳ ରେ ମନ ପାପରେ ଥିବୁ
ମିଛ ମାୟା ଜଞ୍ଜାଳେ ପଡ଼ି ରହିବୁ
ନିଜ ଜୀବନକୁ କେବେ ସଜାଡ଼ିବୁ
ଯୀଶୁ ନିକଟକୁ କେବେ ତୁ ଫେରିବୁ
ବିଳାସ ବ୍ୟସନ ଚିତ୍ତବିନୋଦନ
ଆଉ କେତେ ଦିନ କରୁଥିବୁ…..
ନିଜ ଜୀବନକୁ କେବେ ସଜାଡ଼ିବୁ
ଯୀଶୁ ନିକଟକୁ କେବେ ତୁ ଫେରିବୁ =୦=

ଜଗତର ପଛେ କେତେ ହେବୁ ଧାବମାନ
ଭୋଗ ବିଳାସରେ କେତେ କାଟୁଥିବୁ ଦିନ
ଅନ୍ୟାୟ ଭାବରେ କେତେ ଅରଜିବୁ ଧନ
ମନ୍ଦ ଅଭିଳାଷେ କେତେ ଦେବୁ ତୋର ମନ…
ରଙ୍ଗ ରସ ସବୁ ଯଦି ନ ଛାଡ଼ିବୁ
ନରକ ଯନ୍ତ୍ରଣା ଦିନେ ତୁ ଭୋଗିବୁ…
ନିଜ ଜୀବନକୁ କେବେ ସଜାଡ଼ିବୁ
ଯୀଶୁ ନିକଟକୁ କେବେ ତୁ ଫେରିବୁ….=୧=

ଜଗତର ସୁଖ ସବୁ ଅଟେ ଦିଦିନିଆ
ତଥାପି ବୁଝୁନୁ କାହିଁ ହେଉ ଅମାନିଆ
ଫେରିଆ ଫେରିଆ ଧନ ଛାଡ଼ି ମୋହମାୟା
ଯୀଶୁଙ୍କୁ ଦେଇଯା ମନ ହେବେ ତୋର ସାହା…
ଯଦି ତୁ ଯୀଶୁଙ୍କୁ ହୃଦେ ସ୍ଥାନ ଦେବୁ
ଅନନ୍ତ ଜୀବନ ନିଶ୍ଚେ ତୁ ଲଭିବୁ….
ନିଜ ଜୀବନକୁ କେବେ ସଜାଡ଼ିବୁ
ଯୀଶୁ ନିକଟକୁ କେବେ ତୁ ଫେରିବୁ..=୨=

ଗୀତ ରଚନା ଓ ସ୍ୱର ସଂଯୋଜନା
ଅମିତ୍ ବଡ଼ନାୟକ

ସୂଚୀମାଳାକୁ ଫେରନ୍ତୁ

ଏମିତି ପାପେ ବୁଡିଥିବୁ କେତେ ଦିନ ବନ୍ଧୁ କେତେ ଦିନ
କେବେ ଛାଡ଼ିବୁ ମନ୍ଦ ଗୁଣ
କେବେ ହେବୁ ପରିବର୍ତ୍ତନ
କେବେ ଦେବୁ ଯୀଶୁଙ୍କୁ ସ୍ଥାନ
କେବେ କରିବୁ ତାଙ୍କୁ ଧ୍ୟାନ
ଏମିତି ପାପେ ବୁଡିଥିବୁ କେତେ ଦିନ ବନ୍ଧୁ କେତେ ଦିନ =୦=

ଆଉ କେତେ ଦିନ ବନ୍ଧୁ କରୁଥିବୁ ହେଳା
ଜୀବନଟା ଚାଲିଗଲେ ବୁଡ଼ିଯିବ ଭେଳା
ବଦଳାଇ ଦେ ନିଜକୁ ଥାଉ ଥାଉ ବେଳା
ନୋହିଲେ ଭୋଗିବୁ ଦିନେ ନରକର ଜ୍ୱାଳା
ଜାଣି ଶୁଣି ସବୁ କଥା ଭୁଲାଉଛୁ ନିଜ ମଥା (୨ଥର)
ସଜାଡିବୁ କେବେ ମନ
ହେବୁ କେବେ ସଂଶୋଧନ
ଏମିତି ପାପେ ବୁଡିଥିବୁ କେତେ ଦିନ ବନ୍ଧୁ କେତେ ଦିନ =୧=

ମାୟା ମରିଚିକା ପଛେ କେତେ ଧାଉଁଥିବୁ
ରଙ୍ଗ ରସ ମତ୍ତତାରେ କେତେ ମାତିଥିବୁ
ଛଳ କୂଟ କପଟରେ କେତେ ବୁଡିଥିବୁ
ଅସାର ପଥରେ କେତେ ବାଟ ଚାଲୁଥିବୁ
ଛାଡ଼ି ଏ ମିଛ ଦୁନିଆ ଯୀଶୁ ପାଶେ ତୁ ଫେରିଆ (୨ଥର)
ଦେବେ ତୋତେ ପରିତ୍ରାଣ
ଧନ୍ୟ ହେବ ତୋ ଜୀବନ
ଏମିତି ପାପେ ବୁଡିଥିବୁ କେତେ ଦିନ ବନ୍ଧୁ କେତେ ଦିନ =୨=

ଗୀତ ରଚନା ଓ ସ୍ୱର ସଂଯୋଜନା
ଅମିତ୍ ବଡ଼ନାୟକ

ସୂଚୀମାଳାକୁ ଫେରନ୍ତୁ

ଯୀଶୁ ମୋ ପ୍ରାଣ ଯୀଶୁ ମୋ ତ୍ରାଣ
ଯୀଶୁ ହିଁ ଏକା ମୋହର
ପଥ ସତ୍ୟ ଜୀବନ
ଯୀଶୁ ମୋ ଧନ ଯୀଶୁ ମୋ ଜ୍ଞାନ
ଯୀଶୁ ହିଁ ଏକା ମୋହର
ପଥ ସତ୍ୟ ଜୀବନ …………=୦=

ଯୀଶୁ ହିଁ ଚାଳକ ଦୁର୍ଗମ ପଥର
ଯୀଶୁ ହିଁ ନାବିକ ଜୀବନ ନଦୀର
ଯୀଶୁ ହିଁ ରକ୍ଷକ ବିନାଶ କାଳର
ଯୀଶୁ ହିଁ ଆଲୋକ ଅନ୍ଧାର ବାଟର
ଯୀଶୁ ମୋ ପ୍ରାଣ ଯୀଶୁ ମୋ ତ୍ରାଣ
ଯୀଶୁ ହିଁ ଏକା ମୋହର
ପଥ ସତ୍ୟ ଜୀବନ…………..=୧=

ନାଥ ସେ ଅଟନ୍ତି ଅନାଥ ଜନର
ଆଶା ସେ ଅଟନ୍ତି ନିରାଶା ମନର
ବଳ ସେ ଅଟନ୍ତି ଦୁର୍ବଳ ପ୍ରାଣର
ଢାଲ ସେ ଅଟନ୍ତି ବିଶ୍ୱାସୀ ଗଣର
ଯୀଶୁ ମୋ ଧନ ଯୀଶୁ ମୋ ଜ୍ଞାନ
ଯୀଶୁ ହିଁ ଏକା ମୋହର
ପଥ ସତ୍ୟ ଜୀବନ
ଯୀଶୁ ମୋ ପ୍ରାଣ ଯୀଶୁ ମୋ ତ୍ରାଣ
ଯୀଶୁ ହିଁ ଏକା ମୋହର
ପଥ ସତ୍ୟ ଜୀବନ ………..=୨=

ଗୀତ ରଚନା ଓ ସ୍ୱର ସଂଯୋଜନା
ଅମିତ୍ ବଡ଼ନାୟକ

ସୂଚୀମାଳାକୁ ଫେରନ୍ତୁ